أبديت بك يا المعافي الشافي الوهاب=يا مالك الملك كل الناس تترجاه
من منبع الشعر للجمهور والاصحاب=ازكى تحيات من قلبي لهم مُهداه
لاخاب في لوله ما الثانيه ما خاب=لاطفته لوله في الثانيه ما اخطاه
بالقول كن جاد صادق لا تقع كذاب=صدَّيق صادق صدوق الصدق يتحراه
يقول ابو مشعل البارح فتحت الباب=ذي كان مغلق على الداير ولاحد جاه
عجايب الوقت راس الطفل منها شاب=والعود نار المأسي والعه بحشاه
البارح اخرجت انا اوراقي من الدولاب=مسكين يا من يطالع بالورق ذكراه
هاضت شجوني وشوقي هزته لحباب=وموق لعيان فوق الخد يسكب ماه
سهران ليلي ونومي ما وطاء لهداب=اترقب الصبح وتفرَّح متى مبداه
مجروح ما فادني البلسم ولا العصَّاب=ولا الطبيب المعالج فادني بدواه
من خمس تعشر سنه يدمي ولاقد طاب=حالي كما حال لاجي موطنه ينفاه
والفرق هذاك عايش في بلد لجناب=ونا مواطن ولا كن الوطن يعناه
وتقول مسحور ولا كن بي لعصاب=او فاقد الوعي ما يدري من اللي جاه
مغبون والغبن ولع داخلي شبَّاب=ما بين لضَّلاع نار القهر تتلضاه
عدن عدن فيش سحر الفاتن الجذاب=لولى خيانة حبيبش جعل لا وداه
كنتي الاميره وكنتي حايزه للقاب=لا سامح الله من كان السبب لا ابراه
يا الله يالله يا سامع دعاء الطلاب=يا من لك العبد بث الحُزن والمشكاه
نشكي لك الحال يا الغفار يا التواب=خارجتنا يا منجي كل من ناجاه
